د روسیې او ارمنستان چارواکو د نګورنو قره باغ په اړه خبرې کړي
د پاشینیان دفتر لیکلي چې سرګي شویګو او سرګي لاوروف نن د ارمنستان په پلازمېنه یریوان کې له ارمني صدراعظم سره لیدلي دي.
دغه دفتر د ارمنستان د صدراعظم له قوله ویلي چې ارمنیانو تل د جګړو پر مهال د روسیې ملاتړ حس کړی دی چې په دې کې د ولسمشر ولادیمیر پوتین شخصي او د حکومت ملاتړ شامل دي.
د روسیې دفاع وزیر سرګي شویګو ، ښاغلي پاشینیان ته ویلي چې روسي سوله ساتي ځواکونه چې دا اوربند څاري ، د آذربایجان د بیلې شوې نګورنو قره باغ تقریباً ټوله خاوره تر څار لاندي نیولې.
آذربایجان او ارمنستان پدې وروستیو کې د نګورنو قره باغ پر سر سختي جګړې وکړې، خو د روسیې په منځګړیتوب د دوی ترمنځ د نومبر پر لسمه اوربند وشو.