Байден: рисолати ҷангии сарбозони амрикоӣ дар Ироқ охири исол поён меёбад
Президенти ИМА Ҷо Байден гуфт, нирӯҳои амрикоӣ дар поёни соли 2021 рисолати худро дар Ироқ хотима медиҳанд, вале нақши онҳо ба ҳайси мушовирону тамриндиҳандагони артиши ироқӣ идома хоҳад ёфт. Дар ин бора Байден рӯзи 26-уми июл ҳангоми мулоқоташ бо нахуствазири Ироқ Мустафо Козимӣ дар Кохи Сафед хабар дод. Дар изҳороти муштараки ИМА ва Ироқ, ки онро Департаменти давлатӣ нашр кард, омадааст, ки ҳамкориҳо сари масоили тамрин, машваратдиҳӣ ва табодули иттилои махфӣ тамаркуз хоҳад кард.
ИМА моҳи апрел гуфт, ки 2500 низомии амрикоӣ дар Ироқ монда, кори худро дар самти тамрину машварат идома медиҳанд, вале нагуфт, ки тағйири нақши онҳо кай сурат мегирад. Ҷейн Псаки, сухангӯи Кохи Сафед ба саволи ин ки аз 2500 сарбози амрикоӣ то охири соли ҷорӣ дар Ироқ чӣ шуморе аз онҳо боқӣ мемонанд, посух надод.
Нирӯҳои амрикоӣ 18 сол пеш ба хотири сарнагун кардани Саддом Ҳусайн вориди Ироқ шуданд ва баъдан раҳбарии эътилофи зидди тундгароҳои “Давлати исломӣ”-ро, ки ба кишвар таҳдид мекарданд, ба ӯҳда гирифтанд. Дар изҳороте, ки Кохи Сафед нашр кард, омадааст, ки Байден ва Козимӣ ба идомаи шарикии амниятӣ таъкид намуданд.