Озарбойҷону Арманистон дар ҳодисаи ахир ҳамдигарро гунаҳгор карданд
Озарбойҷону Арманистон, ки тирамоҳи порсол як ҷанги шашҳафтаинаро дар минтақаи ҷудоиталаби Қаробоғи Кӯҳӣ пуштисар карданд, дар тирандозии ахир ҳам ҳамдигарро гунаҳгор намуданд. Ереван гуфт, ки дар ҳодисаи рӯзи 28 июл се сарбози вазорати дифои ин кишвар куштаву ду нафар захмӣ шуданд. Вазорати дифои ин кишвар гуфт, ки нирӯҳои мусаллаҳи Озарбойҷон “бори дигар бо амали таҳрикомези худ муқаррароти оташбасро дар қисмати шимолушарқи сарҳади Арманистону Озарбойҷон вайрон карданд” ва ба сӯи ҳадафҳои Арманистон оташ кушоданд. Вазорати дифои Арманистон масъулияти ин ҳодисаро ба дӯши Озарбойҷон вогузор карда айни замон гуфт, ки дар ҷониби Озарбойҷон ҳам талафоте будааст.
Дар навбати худ вазорати дифои Озарбойҷон Арманистонро дар шиддатёбии вазъ гунаҳгор кард. Дар изҳороти Боку омадааст, ки нирӯҳои мусаллаҳи Арманистон ба сӯи мавқеъҳои нирӯҳои Озарбойҷон дар ноҳияи Калбаҷар баъди нисфишаб оташ кушода ду сарбози озариро захмӣ намуданд.