«Татар-информ» журналисты Гадел Әхмәтҗанов «Многоликая Россия» бәйгесендә җиңде

(Казан, 28 октябрь, «Татар-информ», Гөлүзә Ибраһимова). «Татар-информ» хәбәрчесе Гадел Әхмәтҗанов «Җанисәпле сөйләшү» проекты «Многоликая Россия» бәйгесенең «Интернет массакүләм мәгълүмат чараларында материаллар циклы» номинациясендә өченче урын алды.

«Ел башында „Татар-информ“ агентлыгы „Җанисәпле сөйләшү“ дип аталган проект башлап җибәргән иде. Ул халык санын алуга багышланды. Проект кысаларында төбәкләрдә яшәгән милләттәшләребез белән онлайн һәм оффлайн форматта очраштык. Аларның проблемалары, тормышлары турында сөйләштек», — дип аңлатты проектның асылын Гадел Әхмәтҗанов.

Проектта якынча егерме төбәк вәкиле катнашкан. «Проект, югары бәя алып, өченче урынга лаек булгач, „Җанисәпле сөйләшү“нең нәтиҗәсе булгандыр дип өметләнәбез», — ди журналист.