უკრაინაში რუსეთის ფედერაციის თავდაცვის სამინისტროს პრესსამსახურის პოლკოვნიკი დაიღუპა
უკრაინაში მიმდინარე ომში რუსეთის თავდაცვის სამინისტროს პრესცენტრის თანამშრომელი, პოლკოვნიკი ვლადიმირ ივანოვი, დაიღუპა. ამ ცნობას "მედიაზონა" ადასტურებს მემკვიდრეობის საკითხების რეესტრისა და რუსეთის მონაცემთა ბაზიდან გამოჟონილ ინფორმაციაზე დაყრდნობით.
უფრო ადრე ივანოვის დაღუპვის შესახებ ცნობა გაავრცელა რუსეთის სახელმწიფო ტელევიზიის (ВГТРК ) კორესპონდენტმა, ევგენი პოდდუბნიმ, რომელიც ივანოვის პორტრეტით გამოვიდა 9 მაისის აქციაზე "უკვდავი პოლკი". პოდდუბნიმ დაასახელა მისი სამხედრო წოდება, პოლკოვნიკი, მაგრამ არა სამუშაო ადგილი. მხოლოდ ის აღნიშნა, რომ ივანოვი სამხედრო სამსახურში ფილოსოფიის ფაკულტეტის დასრულების შემდეგ შევიდა.
41 წლის ვლადიმირ ივანოვი, მემკვიდრეობის საკითხების რეესტრის თანახმად, 25 მარტს დაიღუპა. ნოტარიუსმა, რომელიც მისი სამემკვიდრეო საქმე გააფორმა, დაღუპულის საცხოვრებელ ადგილად მიუთითა მოსკოვში მდებარე რუსეთის ფედერაციის თავდაცვის სამინისტროს შენობა.
თავდაცვის სამინისტროს პრესსამსახურს თანამშრომლის გარდაცვალების ფაქტი საჯაროდ არ დაუდასტურებია. ასევე უცნობია, რა ვითარებაში გარდაიცვალა პოლკოვნიკი ვლადიმირ ივანოვი.