თბილისში, სამგორის რაიონში 15 წლის მოზარდი დაჭრეს
„ამტელ ჰოსპიტალში" არის გადაყვანილი თბილისში, სამგორის რაიონში (მეტრომშენის დასახლებაში) დაჭრილი 15 წლის მოზარდი. რადიო თავისუფლების ინფორმაციით, არასრულწლოვანი 74-ე საჯარო სკოლის მოსწავლეა.
„ამტელ ჰოსპიტლის" ბავშვთა ქირურგმა გოჩა ბახტაძემ რადიო თავისუფლებას უთხრა, რომ „[მოზარდს] გადაუდებელი ოპერაცია ჩაუტარდა. დაზიანებები ჰქონდა მუცლის ღრუში, რომლის ლიკვიდაცია მოხდა. ამ ეტაპზე მდგომარეობა დასტაბილურდა და [მოზარდი] გადაყვანილია პოსტოპერაციულად რეანიმაციაში. ამ ეტაპზე პაციენტის სიცოცხლეს საფრთხე აღარ ემუქრება".
როგორც რადიო თავისუფლების კორესპონდენტი შემთხვევის ადგილიდან იუწყება, თვითმხილველები ამბობენ, რომ დაახლოებით 13:00 საათზე გაიგეს ხმაური და რამდენიმე წუთში გამოიყვანეს დაჭრილი მოზარდი.
როგორც შინაგან საქმეთა სამინისტროს პრესსამსახურში გვითხრეს, მიმდინარეობს აქტიური საგამოძიებო მოქმედებები. გამოძიება დაწყებულია სისხლის სამართლის კოდექსის 19-109-ე მუხლით, რაც გულისხმობს დამამძიმებელ გარემოებაში განზრახ მკვლელობის მცდელობას.