Тројца научници ја добија Нобеловата награда за физика

Нобеловата награда за физика годинава ја делат тројца научници- Шукуро Манабе, Клаус Хаселман и Џорџо Париси, за нивниот „иновативен придонес за разбирање на комплексните физички системи“.

"Сложените системи се карактеризираат со случајности и нарушувања кои се тешки за разбирање“, соопшти Шведската академија за науки денеска. Во соопштението академијата наведува дека годинашната награда ги „препознава новите методи за нивно опишување и предвидување на нивното долгорочно однесување“.

Манабе и Хаселман ги поставија темелите на нашето знаење за климата на земјата и како човештвото влијае врз неа, се наведува во соопштението, во кое за Париси се нагласува дека е награден поради неговото револуционерно учество во теоријата за нарушени материи случајни процеси.

Деведесет годишниот Манабе е американски државјанин, Париси е Италијанец, а Хаселман е Германец. Тие ќе добијат златен медал и ќе поделат повеќе од 1,1 милион американски долари.

Оваа година доделувањето на Нобеловите награди почна вчера со објавувањето на наградата за медицина која ја добија двајца американски научници Дејвид Џулиус и Ардем Патапоутиан. Добитниците на другите награди во областите хемија, литература, мир и економија ќе бидат објавени следниве денови.