Бродот со 400 мигранти и натаму плови во Егејско море

Товарниот брод со околу 400 бегалци и мигранти што плови под турско знаме, сè уште не е пренесен на некое од пристаништата во Грција и сè уште се наоѓа во водите на Егејското море, јавува новинската агенција МИА. Грчките медиуми јавуваат дека Атина побарала од Анкара бродот да биде вратен назад во Турција, со оглед на тоа дека тргнал од турското крајбрежје, меѓутоа одговорот бил негативен.

Државната телевизија „ЕРТ“ објави дека бродот се наоѓа во меѓународни територијални води и го придружуваат бродови на грчката крајбрежна служба, додека пак весникот „Катимерини“ пишува дека „продолжува трилерот со товарниот брод со мигрантите“, што ноќта ја поминал во близина на островот Карпатос, а сега се упатува кон островот Кос.

Од крајбрежната служба на Грција вчера соопштија дека во тек е акција за спасување а товарниот брод и го водат на безбедно место.

Голема спасувачка акција на грчката крајбрежна стража источно од Крит

Посочија дека станува збор за „една од најголемите операции за истрага и спасување спроведена во Источниот Медитеран“, но и дека за дополнителни информации за разврската ќе излезат со ново соопштение.

Медиумите во Грција објавија дека крајната дестинација на бродот била Италија, а бегалците и мигрантите се од Авганистан и Пакистан.