Во Глазгов почнува климатскиот самит COP26

Конференцијата на Обединетите нации за климатски промени (COP26) започнува денеска во Глазгов и ќе трае до 12 ноември. COP26 се смета за клучен обид да се принуди светот да излезе со конкретни планови за одржување на порастот на температурата до максимум 1,5 степени. Домаќин на состанокот е британскиот премиер Борис Џонсон и ќе собере повеќе од сто лидери, меѓу кои и американскиот претседател Џо Бајден, францускиот претседател Емануел Макрон и индискиот претседател Нарендра Моди. Лидерите на Русија и Кина, Владимир Путин и Си Џинпинг нема да присуствуваат физички, туку ќе бидат вклучени преку видео врска, како и британската кралица Елизабета Втора.

Климатските промени водат кон конфликти во светот

Кери и Лавров: САД и Русија ќе соработуваат во борбата против климатските промени

Пред самитот на Групата 20 најиндустриски и најразвиени земји во петокот во Рим, Џонсон рече дека модерната цивилизација може да се распадне како антички Рим доколку светските лидери не преземат мерки за борба против климатските промени. Џонсон им рече на новинарите дека урнатините на Рим се „фантастичен потсетник, „memento mori“ за луѓето денес, дека човештвото, цивилизацијата, општеството можат да одат наназад, како и напред, и кога работите ќе тргнат наопаку, тие можат да одат исклучително брзо. Џонсон ќе ги повика лидерите на Г-20 да дејствуваат побрзо, велејќи дека земјите во светот кои се збогатиле со користење на фосилни горива кои го поттикнуваат глобалното затоплување, мора да го понесат најголемиот товар во борбата против климатските промени.