Resmiler: Saudlylar ABŞ-a Eýranyň patyşalyga hüjüm etmek ähtimallygyny duýdurýar

Saud Arabystany amerikan resmileri bilen Eýranyň patyşalyga garşy hüjüme taýýarlanýan bolmagynyň ähtimallygyny aňladýan aňtaw maglumatlaryny alyşdy diýip, ABŞ-nyň üç resmisi 1-nji noýabrda aýtdy.

Saud Arabystanyna garşy bolup biljek hüjüm baradaky aladalar ABŞ-nyň prezidenti Jo Baýdeniň administrasiýasynyň Tährany ýurtda giň ýaýran halk protestlerini basyp ýatyrmagy sebäpli tankytlamagynyň we Russiýa Ukraianada ulanmak üçin iberen ýüzlerçe pilotsyz uçary, şeýle-de Moskwa beren tehniki goldawy üçin ýazgarmagynyň yz ýanynda ýokarlandy.

Saud resmileriniň beren habaryna görä, Eýran, ýurt içindäki protestlerden ünsi sowmak üçin, Saud patyşalygyna we Yragyň Erbil şäherine hüjüm etmegi meýilleşdirýär.

ABŞ, Saud Arabystany we sebitdäki birnäçe ýurt öz ýaragly güýçleriniň söweşe taýýarlyk derejesini ýokarlandyrdy diýip, "The Wall Street Journal" ýazýar.