Түркияда "жалган маалымат" мыйзамы күчүнө кирди
Түркияда жалган маалымат жөнүндө кабыл алынган мыйзам 18-октябрдан тарта күчүнө киргенин мамлекеттик Resmi гезити кабарлады.
Түрк парламенти кабыл алган жаңы мыйзамга ылайык, "өлкөнүн ички жана тышкы коопсуздугуна, коомдук тартипке жана жалпы саламаттыгына байланыштуу эл арасында кооптонуу, дүрбөлөң жаратуу максатында жалган маалымат тараткандар" бир жылдан үч жылга чейин эркиндигинен ажыратылышы мүмкүн.
Айрыкча бул мыйзам социалдык тармактарды колдонуучуларга тийиштүү экени айтылууда.
Түркияда 2007-жылдан 2015-жылга чейин YouTube, Твиттер жана Фейсбук бир канча жолу соттун чечими менен жабылган. Буга кишилердин намысына шек келтирген посттор, сүрөттөр жана билдирүүлөр себеп болгону айтылган.
Түркиянын 84 миллиондон ашык калкынын 62 миллиону интернет колдонору, алардын 54 миллиону соцтармактарды жигердүү пайдаланары тууралуу маалыматтар бар.
Эл аралык “Чек арасыз кабарчылар” уюмунун былтыркы баяндамасында Түркиянын сөз эркиндиги боюнча рейтинги төмөндөп, 180 өлкөнүн ичинен 153-орунду ээлеген.
Дүйнөдөгү мыйзам үстөмдүгүнүн индексинде Түркия 139 өлкөнүн ичинде 117-орунда турат. Ал эми Freedom House уюмунун акыркы жылдагы “Интернет эркиндиги” баяндамасында Түркия “эркин эмес өлкөлөрдүн” катарына кирген.