Rekord viktimash nga mbidoza e drogës në SHBA

Më shumë se 100,000 amerikanë kanë vdekur si pasojë e mbidozës së drogës përgjatë një viti dhe në kohë të pandemisë së koronavirusit.

Kjo është shifra më e lartë vjetore që është regjistruar ndonjëherë në Shtetet e Bashkuara.

Të dhënat nga Qendrat për Parandalimin dhe Kontrollin e Sëmundjeve, kanë treguar se vdekjet nga mbidoza janë rritur për 28.5 për qind në periudhën prill 2020 – prill 2021.

Ekspertët besojnë se mbidoza mund të jetë shkaktuar për shkak të ndikimit të pandemisë dhe furnizimit me substanca sintetike siç është fentanil.

Raste me mbidozë janë raportuar në shumicën e qyteteve amerikane.

Sipas autoriteteve amerikane, në periudhën paraprake ishin regjistruar 78,056 viktima.

Katherine Keyes, eksperte për drogat dhe profesoreshë për epidemiologji në Universitetin Kolumbia, ka thënë për BBC-në se rritja e numrit të viktimave ka qenë “eksponenciale” në vitet e fundit, dhe pandemia ka“qenë sikur nafta në zjarr”.

“Të dhënat na tregojnë se ka më shumë njerëz që përdorin drogat vetëm dhe prandaj e dimë se aty ka rrezik të mbidozës”, ka sqaruar ajo.

“Në këtë periudhë ka pasur edhe ulje të shërbimeve që mund të parandalojnë mbidozën”, duke përfshirë trajtimet dhe shërimin.

Numri i personave që kanë vdekur si pasojë e mbidozës së drogës ka tejkaluar personat që kanë vdekur nga armët, aksidentet me makina dhe gripi sezonal.

Numri më i madh i viktimave ka qenë në Vermont, Virxhinia Perëndimore dhe Kentaki.