د بښنې نړیوال سازمان: د ایران له نوي ولسمشره دې د جرمونو څیړنه وشي
د بښنې نړیوال سازمان د ایران د ولسمشر په توګه د ابراهیم رييسي د بریالیتوب د اعلان په غبرګون کې وویل، له نوموړي څخه باید د جرمونو تحقیقات وشي.
دې ډلې د ۱۹۸۸ کال په دوبي کې د زرګونو سیاسي بندیانو اعدام کېدو ته په اشاره ویلي، د ایران راتلونکی ولسمشر ابراهیم رييسي باید د نړیوالو جرمونو په خاطر تر جنايي تعقیب لاندې راوستل شي.
د بښنې نړیوال سازمان یا ایمنسټي انترنیشنل پرون شنبه (د غبرګولي په ۲۹مه) په یوه اعلامیه کې د ۱۹۸۸ کال پېښې د بشریت پر ضد جنایتونه بللي دي.
د ۱۹۸۸ کال په دوبي کې د روح الله خمیني په امر ډېر شمېر سیاسي بندیان په داسې حال کې اعدام شول چې ابراهیم رييسي د تهران د څارنوالۍ مرستیال او د هغه پلاوي غړی و چې د مرګ په پلاوي مشهور و. دغه پلاوي د بندیانو د اعدامونو په اړه پرېکړې کولې.