Türkmenistan Türkiýede galan raýatlaryny ýurda getirmek üçin ýörite uçuş guraýar

Hökümetçi “Türkmenportal” neşiri Türkmenistanyň 14-nji ýanwarda COVID-19 koronawirus pandemiýasy sebäpli Türkiýede galan türkmen raýatlaryna Türkiýäniň Stambul şäherinden Türkmenistanyň Türkmenabat şäherine alyp geljek uçar gatnawyny gurnaýar diýip, 13-nji ýanwarda habar berdi.


Türkmenistan tarapyndan gurnalan we “Türkmenhowaýollarynyň” ýörite gatnawynda amala aşyryljak uçuş, Stambulyň halkara aeroportynyň resmi saýtynda aýdylmagyna görä, ýerli wagt bilen sagat 10:00-da açar.   


Şeýle-de habarda ýurduna gaýdyp gelen raýatlaryň ählisiniň 21 günüň dowamynda hökmany karantin düzgüninde saklanjakdygy aýdylýar.


Türkmenistan pandemiýa döwründe daşary ýurtlarda galan raýatlaryny yzyna getirmek işlerini dowam etdirýär, ýöne daşary ýurtlarda ýaşaýan türkmen aktiwistleriniň köpüsi hökümetiň bu ugurdaky tagallalarynyň ýeterlik däldigini aýdýarlar we ýollaryň açylmagyny talap edýärler.