Тюбингта шуганда имгәнеп, ике атна эчендә балалар хастаханәсенә 19 бала эләккән
Республика балалар клиник хастаханәсенә ике атна эчендә тюбингларда — аларны шулай ук «ватрушка» дип атыйлар — шуганнан соң имгәнеп, 19 бала килгән. Бу хакта «Татар-информ» да узган матбугат конференциясендә Татарстан Сәламәтлек саклау министрлыгының баш балалар травматолог-ортопеды, 2 нче санлы Балалар республика клиник хастаханәсенең травматология-ортопедия бүлеге җитәкчесе Руслан Хәсәнов сөйләде.
«Узган җомгада «ватрушка»да шуганнан соң Балалар республика клиник хастаханәсенә 9 кеше китерелде. Хәзер инде бездә 19 шундый пациент бар, ягъни соңгы яуган кардан соң 10 кешегә артты», — дип сөйләде табиб.
Балалар республика клиник хастаханәсе табиблары кечкенә пациентларга 9 тән җәрәхәте һәм тәннең төрле өлешләре 10 җирдән сынган дип диагноз куйган. Табиб сүзләренчә, «ватрушка»да шуганнан соң ел саен төрле җәрәхәтләр алган балаларны китерәләр. Бу — аяк-куллар, умрау сөяге имгәнүе дә, баш һәм умыртка баганасы зарарлануы да.
Травматолог ассызыклаганча, кайвакыт бик авыр җәрәхәтләр алган балалар китерелә, үлем очраклары да була. Чөнки күпләр махсус тауда түгел, ә кая туры килсә — шунда шуа.