Гыйнвар аеннан миллионлаган россияле балаларга арттырылган пособие ала башлаячак

2024 елның гыйнварыннан Россиядә яшәү минимумы арта, ул күп кенә пособиеләр күләменә йогынты ясый. Бу — федераль бюджетта салынган. Бу хакта Россия Социаль фонды хәбәр итә, дип яза «Российская газета».

Шуңа бәйле рәвештә хәзерге вакытта 10,7 миллионнан артык баланың әти-әнисе һәм 390 меңнән артык йөкле хатын-кыз ала торган бердәм пособие күләме артачак. Исегезгә төшерәбез, закон нигезендә пособие суммасы балага яки эшкә яраклы өлкән кешегә төбәк яшәү минимумыннан чыгып билгеләнә.

Узып баручы елда бердәм пособиенең уртача күләме аена 7-13, 9 мең сум тәшкил итә (баланың яшәү минимумының 50 яки 100 проценты). Яшәү минимумын индексацияләгәннән соң аның күләме аена 500-1000 сумга (+7,5 процент) артачак һәм 7,5 меңнән 15 мең сумга кадәр тәшкил итәчәк.

Ә йөкле хатын-кызлар өчен бердәм пособие күбрәк артачак һәм айга уртача 8,4 меңнән 16,8 мең сумга кадәр тәшкил итәчәк.

Шулай ук яшәү минимумына бәйле башка бала түләүләре дә арттырылачак. Аерым алганда, бу 3 яшькә кадәрге беренче балага айлык пособие һәм 3 яшькә кадәрге балаларга ана капиталыннан айлык түләүләргә кагыла. Мондый түләүләрне бүген 1,3 миллионнан артык баланың әти-әнисе ала. Пособие суммасы бала яшәгән төбәктә бер яшәү минимумы күләмен тәшкил итә. Яңа елдан түләү күләме 1000 сумнан артып, ил буенча ай саен уртача 15 мең сум тәшкил итәчәк.