Миңнеханов «Теләкләр чыршысы»нда катнашкан тагын өч баланың хыялларын чынга ашырачак
Татарстан Рәисе Рөстәм Миңнеханов бүген РФ Дәүләт Советы утырышы алдыннан «Теләкләр чыршысы» бөтенроссия хәйрия акциясенә кушылды. Бу хакта ТНВ телеканалының Мәскәү филиалы материалларына сылтама белән республика җитәкчесе матбугат хезмәте хәбәр итә.
Рөстәм Миңнеханов Зур Кремль сараеның Владимир залына урнаштырылган чыршыдан берничә шарны алды. Шарлар эчендә Идел буе федераль округы төбәкләреннән булган балаларның Яңа ел теләкләре бар иде.
Фото: © ТР Рәисе матбугат хезмәте
Шулай итеп, Татарстан Рәисе 15 яшьлек Дарина, тугыз яшьлек Егор һәм биш яшьлек Камиләнең хыяллары турында белде. Кыз ВДНХга барырга тели, ә ике малай да Кыш бабайдан сюрприз бүләкләр сораган.
ММЧ вәкилләре белән әңгәмәдә Рөстәм Миңнеханов балаларның Яңа ел теләкләрен кыска вакыт эчендә үтәячәгенә ышандырды. Сюрприз-бүләк нәрсә була ала дигән сорауга җавап итеп, ул балачагында барысы да мандариннар турында хыялланганнарын, әмма хәзер балаларның нигездә бүләккә ниндидер заманча гаджет алырга теләүләрен билгеләп үтте.