Гаилә елына багышлап, Чувашиядә Гаилә фестивале узачак

2024 елның мартында Чувашиядә традицион мәдәниятнең «Буыннарны бәйләүче бәйрәм» республика Гаилә фестивале узачак. Ул 10 нчы тапкыр уздырыла. Ун ел рәттән Чувашия мөселманнары Диния нәзарәте әлеге бәйрәмне оештыра. Бу хакта Россия мөселманнары Дини җыены Үзәкләштерелгән дини оешмасы матбугат хезмәте хәбәр итә.

Фестиваль Россия Президенты указы белән расланган Гаилә елына багышланачак. Чарада төп кунаклар гаилә тормышы юбилярлары һәм яшь парлар булачак.

Ел саен чара зурая, киңәя бара. Әлеге тормыш бәйрәмендә катнашучы гаилә парлары саны арта бара. Бу бәйрәм көч-дәртләре һәм хис-тойгылары ташып торган яшьләргә 50, 55 һәм 60 ел бергә яшәгән гаилә парларының лаеклы үрнәген күрергә ярдәм итә, диелә хәбәрдә.