د طالبانو سوداګرۍ وزارت ايراني چارواکو سره پر اقتصادي مسايلو خبرې کړي
دې وزارت د یوې خبرپاڼې په خپرولو سره ویلي دي چې د طالبانو د حکومت د سوداګرۍ او صنعت وزارت مرستیال ملا قدرت الله جمال د ایران د لارو او ښار جوړونې وزارت له ځانګړي استازي میر شفیعي او په کابل کې د ایران سفارت له اقتصادي اتشې حسن شېرزادي سره په اقتصادي مسایلو خبرې کړي دي.
په خبرپاڼې کې راغلي دي چې په دې لیدنه کې د سرحدي بنسټونو، بندرونو او صنعتي پارکونو د پیاوړتیا او د سوداګریز بېلانس په اړه خبرې شوې دي.
یاد وزارت د ښاغلي شفیعي له قوله لیکلي دي چې د دووه اړخیزه هوکړو پر بنسټ کېدلای شي، د دواړو هېوادونو ترمنځ سوداګري په ښه ډول تنظیم شي.