افغان سوداګر بهر ته د جلغوزیو صادراتو پر وړاندې له ستونزو شکایت کوي
د افغانستان د سوداګرۍ او پانګونې خونې د خبرپاڼې په خپرولو سره ویلي، چې د ځنغوزیو سوداګرو او صادرونکو د یادې خونې له مرستیال سره په لیدنه کې، له هغه غوښتي چې بهر ته د افغانستان د جلغوزیو د صادراتو په برخه کې رامنځته شوې ستونزې ور حل کړي.
د جلغوزیو صادرونکي شکایت کوي، چې د ځمکې له لارې ګاونډیو هېوادونو ته د صادراتو برخه کې د ستونزو ترڅنګ، په وروستیو میاشتو کې د هوایي دهلیز له لارې بهر ته د جلغوزیو د صادرولو په برخه کې له ستونزو سره مخ شوي.
جلغوزي د افغانستان له مهمو صادراتي توکو څخه دي، چې د ګاونډیو هېوادونو سربېره، د هوایي دهلیز له لارې چین، هند، متحده عربي اماراتو او ترکیې ته هم صادرېږي او په نړیوال بازار کې په ښه قیمت پلورل کېږي.