سیګار: د طالبانو لهخوا پر ښځو د کار بندیز به اقتصادي ناورین لا زیات کړي
د افغانستان د بیارغونې لپاره د امریکا د مرستو پر سر د څار ادارې/ سیګار دا خبره نن په خپل ټویټر باندې لیکلې ده.
په ټويټ کې زیاته شوې چې د طالبانو په بیا واکمنېدو او د ښځو پر کار بندیز به د افغانستان اقتصادي ناورین لا پسې زیات او بېوزلي به لا پسې زیاته کړي.
سیګار یو نیم وخت د خپلو پخوانیو راپورونو مهمې برخې په ټویټر خپروي او اوسنۍ څرګندونې یې پخوا په یوه مفصل راپور کې هم کړې وې.
د سیګار د ټویټ په بله برخه کې راغلي چې ۲۰۲۰ کال د افغانستان کاري قوه څه باندې ۲۱ نیم سلنه ښځې وې.
د ۲۰۲۱ کال د اګسټ په ۱۵مه طالبان واک ته ورسېدل او سمدستي يې له روغتیا او پوهنې پرته په نورو اکثرو برخو کې کارکوونکې په کورونو کېنولې.
طالبان ادعا کوي چې ښځو ته په کورونو کې معاش ورکوي او په داسې کړنلارو کار کوي چې وکولای شي د ښځو د کار لپاره د دوی په خبره سمه زمینه برابره کړي.