د قزاقستان د استخباراتو پخوانی رئیس د ملي خیانت په تور ونیول شو
نوموړی په دې هېواد کې د خونړیو اعتراضونو پر مهال له نیول کېدو دوه ورځې مخکې له دندې لیرې شوی و.
د قزاقستان د ملي امنیت کمیټې د ماسیموف د نیول کېدو په اړه د جزئیاتو له ورکولو پرته ویلي چې یو شمېر نور امنیتي چارواکي هم نیول شوي دي.
۵۶ کلن ماسیموف چې دوه ځلې یې د صدراعظم په توګه هم دنده ترسره کړې د پخواني ولسمشر نورسلطان نظربایوف له نږدې کسانو ګڼل کېږي.
معترضان چې د سونګ د موادو د بیو د لوړېدو په غبرګون کې یې تېره اوونۍ له تاوتریخوالي ډکې مظاهرې پیل کړې، تر ډېره نظربایف ته په غوسه وو.
ماسیموف له ۲۰۱۶ کال راهیسې د قزاقستان د استخباراتو د رئیس په توګه دنده لرله.
د قزاقستان د کورنیوچارو وزارت ویلي دي چې د دې اعتراضونو پرمهال ۴۰۰۰ تنه مظاهره چیان نیول شوي دي.
د قزاقستان حکومت د وضعیت د کابو کولو لپاره د ډله ییز امنیت د سازمان چې مشري یې مسکو کوي، د مداخلې غوښتنه وکړه.