امیر خان متقي: تهران کې مو له ایراني چارواکو سره خبرې رغنده وې
له ښاغلي متقي سره د اقتصاد، صنعت او سوداګرۍ سرپرست وزیران، د افغانستان بانک لوی رئیس او د څو وزارتونو معینان په دې سفر کې ملګري دي.
امیرخان متقي چې له یوه جګپوړي دولتي پلاوي سره یوځای پرون تهران ته ولاړ په یوه بیان کې چې د افغانستان د بهرنیو چارو وزارت خپور کړی ویلي چې هیله لري د دې سفر پایلې هم مثبتې وي.
متقي ویلي:" مجلسونه مو د ایران د بهرنیو چارو له وزیر، د افغانستان لپاره له ځانګړي استازي او نورو مسؤلینو سره په ټولو برخو کې مثبت وو، او هیله من یو چې نتایج به یې هم ښه وي."
د طالبانو حکومت چې په نړیوال ډګر کې د رسمیت موندنې لپاره هڅه کوي په کور دننه هم له سختو اقتصادي ستونزو سره لاس ګرېوان دی.
د ایران، پاکستان او نورو ګاونډیانو په ګډون د نړۍ هېڅ هېواد هم تراوسه د طالبان حکومت په رسمیت نه دی پېژندلی.