د قزاقستان ولسمشر: د تېرې اوونۍ لاریونونه د تروریستانو یرغل او د کودتا هڅه وه
قاسم جومارت توقایوف نن دوشنبې( د مرغومې په ۲۰مه) د پخواني شوروي له جمهوریتونو جوړ، د ډله ییز امنیت د سازمان د غړو هېوادونو انلاین سرمشریزې ته د وینا پرمهال دا ادعا وکړه.
دا سرمشریزه د قزاقستان د وروستیو تحولاتو په اړه د بحث لپاره جوړه شوې ده.
توقایف وویل، د اصلاحاتو د غوښتونکو مظاهره چیانو اعتراضونه چې په ترڅ کې یې تاوتریخوالی پېښ شو اوس پای ته رسېدلي دي.
هغه زیاته کړه چې د تېرې اوونۍ اعتراضونه پر دې هېواد د تروریستانو د یرغل نتیجه وه.
هغه ادعا وکړه چې معترضانو غوښتل کودتا وکړي.
توقایف له خلکو د معلوماتو د پټولو راپورونه رد کړل او د اعتراضونو د عیني شاهدانو هغه څرګندونې یې بې اساسه وبللې چې ګنې پر سوله ییزو معترضانو د چارواکو له خوا برید شوی.
د توقایف حکومت د اعتراضونو پرمهال بېړنی حالت اعلان کړ او د جنوري په ۵مه نېټه د ډله ییز امنیت سازمان چې روسیه، تاجیکستان، قرغزستان، بلاروس، ارمنستان او قزاقستان یې غړي دي سمدستي موافقه وکړه چې له دې هېواد سره د امنیت په ټینګښت کې مرسته وکړي.