د تاجکستان ولسمشر: د افغانستان په شمال ختیځ کې نږدې ۶ زره وسله وال فعال دي
ښاغلي رحمان د دې سازمان په انلاین سرمشریزه کې چې نن د قزاقستان د سیاسي بحران په اړه د بحث لپاره جوړه شوې وه دا وینا وکړه.
رحمان وایي:" موږ له دې کبله ډېر اندېښمن یو چې د داعش ډلې د خراسان څانګې جنګیالي د افغانستان په قلمرو کې خپل حضور پیاوړی کوي. زموږ د ځانګړو خدماتو د معلوماتو له مخې د ډله ییز امنیت سازمان جنوبي پولو ته نږدې سیمو کې د افغانستان په شمال کې د تروریستانو ۴۰ مرکزونه او د روزنې ځایونه شته او د جنګیالیو شمېر له شپږ زرو اوړي."
ښاغلي رحمان زیاته کړه چې د افغانستان او تاجکستان په سرحد کې وضعیت ورځ په ورځ نور هم پېچلی کېږي.
د یادونې وړ ده چې په افغانستان کې د طالبانو له واکمنېدو وروسته د طالبانو او تاجکستان د حکومتونو ترمنځ اړیکې ترینګلي شوې او په دې ترڅ کې د دواړو خواوو ترمنځ ځینې ناندرۍ هم وشوې.