سپینه ماڼۍ افغانستان کې پر بشري مرستو ۳۰۸ ملیونه ډالره نوره بسپنه هم لګوي
د ازادۍ راډیو د خبر مرکزي څانګې په حواله، له دې مرستې سره له تېرې اکتوبر میاشتې راهیسې له افغانستان سره د امریکا د مرستو اندازه ۷۸۲ ملیون ډالرو ته ورسېده.
د سپینې ماڼۍ ویاندې ایملي هورن نن په یوې اعلامیې کې وویل، د امریکا د نړیوالې پرمختیایي ادارې دغه بشري مرستې به د خپلواکو بشري سازمانونو له لارې ولګول شي.
په همدې حال کې ملګرو ملتونو نن ویلي چې روان میلادي کال په افغانستان کې د بشري غمېزې د مخنیوي لپاره ۵ ملیارد ډالرو ته اړتیا ده.
پر افغانستان د طالبانو د ولکې له ټینګولو وروسته د افغانستان بانک شااوخوا ۹ نیم ملیارد دالره شتمنۍ په امریکا کې کنګل شوې چې ورسره په افغانستان کې بې کاري او بې وزلۍ هم پراخه شوې ده.