د غېږ نیونې سیالۍ؛ د غزني غېږنیوونکو لوبغاړو لومړی مقام خپل کړ
د بدني روزنې او ورزش ادارې نن یکشنبه د یوه خبر په خپرولو سره ویلي، دې سیالیو کې د غزني ولایت ۸ لوبغاړو برخه اخېستې وه چې له دې ډلې ۵ غېږ نیوونکو خپلو سیالانو ته ماته ورکړه او لومړی مقام یې خپل کړ.
دا غېږنیوونکي غزني ته له ستنېدو وروسته د دې ولایت د ورزشي امریت او د غزني د خلکو له لوري وستایل شول.
د غېږنیونې دا سیالۍ په ننګرهار کې پیل شوې وې چې د ۶ ولایتونو غېږنیوونکو په کې برخه اخېستې وه.
د دې سیالیو د جوړولو هدف د لوبغاړو هڅول او د لوبغاړو د وړتیا رابرسېره کول ښودل شوي دي.