بایډن له طالبانو د امریکا د ساختماني انجنیر د خوشې کېدو غوښتنه کړې
په کابل کې د مارک فریریکس په نوم د دغه امریکايي وګړي د برمته کېدو دوه کاله پوره شول.
ویل کېږي، دغه امریکايي وګړی ښايي په طالبانو پورې د تړلې ډلې، حقاني شبکې په ولکه کې وي، خو طالبانو په دې اړه تازه څه نه دي ویلي.
سپینې ماڼۍ پرون د ولسمشر بایډن په وینا ویلي، د امریکا د یوه بې ګناه وګړي خوندیتوب ته ګواښ پېښول د منلو وړ نه دي.
ولسمشر بایډن له طالبانو غوښتنه کړې، که تمه لري د مشروعیت ترلاسه کولو په اړه یې غور وشي، باید مارک ژر تر ژره خوشې کړي.
بل خوا د امریکا د بهرنیو چارو وزارت ویلي، له طالبانو سره په هره کتنه کې د مارک فریرېکس د برمته کېدو قضیه یاده شوې او د هغه خوشې کېدل د امریکا لپاره له اصلي لومړیتوبنو دي.