افغانستان کې 'پنځه ملیونه ښځې' د کاري فرصتونو په تمه په کور ناستې دي
د مارچ اتمې نېټې (د ښځو نړیوالې ورځې) ته د رسېدو په درشل کې د افغانستان د ښځو چارو وزارت، د حکومت په رهبرۍ په ځانګړي ډول په ۳۴ ولایتونو کې د مرستيالانو په بست کې د ښځو ګمارنه د هېواد په تاریخ کې پوه لویه لاسته رواړنه ګڼي.
حسینې صافۍ د دوشنبې په ورځ «۱۳۹۹ کال د کب ۱۱» په هغه ناسته کې چې د سیمهییزو ارګانونو خپلواکۍ ادارې لهخوا د امریکا د نړیوالې پراختیایي ادارې په مرسته له ښځو د ملاتړ په موخه، په ښې حکومتوالۍ کې د ښځو د ونډې په نوم جوړه شوې وه، د ښځو په مشارکت او د دوی د کاري ظرفیت په لوړولو باندې ټینګار وکړ.
اغلې صافۍ دغهشان وویل، په سیاست کې ښځو خپله ونډه تثبیت کړې ده.
اغلې صافۍ زیاته کړه: "هغه څه ته چې موږ عدالت غوښتنه ورته وکړه، په رسمي پروسې بدله شوه او د خدای په فضل تر راتلونکې یوې میاشتې په ۳۴ ولایتونو کې د ښځینه مرستیالانو ګمارل بشپړېږي.د ښځو چارو وزارت د همغږۍ په یوې طرحې کار کړی چې ډېر ژر به د سیمهیيزو ارګانونو ادارې ته ولېږل شي."
په ورته وخت کې د اقتصاد وزارت وزيره کریمه حامد فاریابي وایي، په هېواد کې یوازي ۱۶.۶ سلنه ښځې کار کوي چې دا شمېر ډېر کم دی.
د اغلې فاریابي په خبره اوسمهال پنځه ملیونه ښځې په کور ناستې دي او د کار زمینه ورته نهده براره شوې.
اغلې فاریابي وايي: "۱۶.۶ سلنه ښځې کار لري پاتې نورې وزګاره دي. شمېرې ښیي چې پنځه ملیونه ښځې کورونو کې دي، یو لوی ځواک چې د ټولنې هوساينه، موږ او تاسې ورته اړتیا لرو."
دا په داسې حال کې ده چې د ښځو چارو وزارت د رسمي شمېرو له مخې، په ملکي خدمتونو کې د ښځو ونډه ۲۹ سلنې ته رسېدلې چې له دې شمېر څه د پاسه ۱۰ سلنهیې د دولتي ادارو د رهبرۍ په برخه کې کار کوي.
په کابل کې د امریکا سفارت سرپرست، راس وېلسن هم په خپله ټویټرپاڼه د مارچ د اتمې نېټې په مناسبت، په امنیت، روغتیا، ټولنه، ښوونه او نورو برخو کې د ښځو ونډه مهمه ګڼلې او خپل هېواد یې په ټوله نړۍ کې د جنسیتي برابرۍ ملاتړ ګڼلی دی.
په ورته وخت کې جوړې شوې غونډې ته د دفاع وزارت مرستیالې منیرې یوسفزاده وویل، له هر بل وخت څخه په حکومت کۍ د ښځو ونډه زیاته شوې ده.
اغلې یوسفزاده وویل: "موږ اوسمهال نظام کې څه د پاسه درې زره ښځې لرو. شاید د کمیت له اړخه کمې وي، خو د هېواد اوسني وضعیت، فرهنګ او د خلکو د زدهکړې کچې ته په کتو یو د پام وړ کمیت دی او موږ یې باید قدر وکړو."
په دې ناسته کې د ۲۱ ولایتونو مرستیالانو هم ګډون کړی و.
د ښځو د مشارکت پروګرام، د امریکا د نړیوالې پراختیا ادارې له اوږدمهالو پروګرامونو څخه دی چې له پنځو کلونو راهیسې د ښځو د ظرفیت جوړونې په برخه کې کار کوي.