ازبک او افغان سوداګریزو شرکتونو د زعفرانو د پلور تړون لاسلیک کړ
د افغانستان او ازبکستان د سوداګریزو شرکتونو ترمنځ د زعفرانو د پلور تړون لاسلیک شو.
د صنعت او سوداګرۍ وزارت وایي، ازبکستان ته د ځینو افغان سوداګرو د سفر پر مهال په میاشت کې د ۱۰۰ ګیلو ګرامه زعفرانو د پلور تړون د افغانستان او ازبکستان د سوداګرو ترمنځ لاسلیک شو.
د دې وزارت ویاند فواد احمدي ازادي راډیو ته وویل، د دې تړون پر بنسټ د ازبکستان سوداګر هره میاشت ۱۰۰ ګیلو ګرامه زعفران له افغان سوداګرو پیري، په ازبکستان او نورو اسیايي هېوادونو کې يې پلوري.
د ښاغلي احمدي په خبره په میاشت کې ۱۰۰ ګیلو ګرامه زعفران چې کال کې ۱۲۰۰ ګیلو ګرامه کېږي په سیمه او اسیایي هېوادنو کې د زعفرانو د پلور یو ستر اقدام بلل کېږي.
نوموړی زیاتوي، همدا راز په دې سفر کې افغان سوداګرو د ازبکستان له سوداګرو سره بېلابېلې ناستې درلودې چې د دواړو هېوادونو ترمنځ د پانګونې او سوداګريزو همکاریو په هکله يې خبرې اترې وکړي.
د صنعت اوسوداګرۍ وزارت د دې تړون د هرکلي ترڅنګ ټینګار وکړ چې د ازبکستان سوداګر دې د نړې مختلفو هېوادونو ته د زعفرانو په صادراتو کې زیاتوالي راوړي.
د زعفرانو د تولید له پلوه افغانستان د نړۍ د درې سترو هېوادنو څخه شمېرل کېږې او هم افغان زعفران د نړۍ د ښه کیفیت او خوند لرونکي زعفرانو څخه دي.