د کانونو او پټرولیم وزارت د قاچاق مخنیوي لپاره مېکانېزم جوړ کړی
د دغه وزارت ویاند محمد عزیز غروال نن شنبه (د کب ۲۳مه) ازادي راډیو وویل چې په دې اړه جدي بحث شوی څو د قاچاق او غیرقانوني کیندنو مخنیوی يې وشي.
نوموړي وویل چې وزارت د قاچاق د مخنیوي لپاره یو مېکانېزم هم جوړ کړی دی.
د کانونو او پټرولیم وزارت او د هلمند ولایت محلي ادارې، په هغه ولایت کې د کانونو د غوره مدیریت په اړه لازمې سلا مشورې کړي دي.
ښاغلی غروال وایي، د هلمند د حوزې د نفت او ګازو د سروې لپاره د وزارت د پلانونو ترڅنګ د نورو کاني زېرمو د اقتصادي څېړنو په اړه هم خبرې شوي.
چارواکي وایي، هلمند د کاني زېرمو پراخ ظرفیت لري چې د واضح مېکانیزم په رڼا کې له دې ظرفیتونو د کاري فرصتونو د ایجادولو، د ولسي مشارکت د پیاوړتیا او د اقتصادي رفاه لپاره به اغېزناکه ګټه به واخېستل شي.