افغانستان کې ښوونکو ته د کرونا ویروس ضد واکسین تطبیق پيل شو
د افغانستان د عامې روغتیا وزارت د کرونا ویروس ضد وکسین د تطبیق درېیم پړاو پیل کړ.
د واکسین د تطبیق په دې پړاو کې عامې روغتیا وزارت پلان لري چې د ښوونځیو او پوهنتونونو ۴ لکه ښوونکي واکسین کړي.
د دې وزارت مرستیال ویاند میرویس علي زي ازادي راډيو ته وویل: "نن په رسمي ډول د کابل په الفتح لېسه کې استادانو ته د کرونا وکسین د تطبیق عملي چارې پیل شوې، موږ د کرونا ویروس د واکسین د تطبیق په څلورمه اوونۍ کې یو."
خو یو شمېر ښوونکي انتقاد کوي او وايي، په داسې حال کې چې ښوونکي د ټولنې له نورو غړو زیات د کرونا ویروس له خطر سره مخ دي په درېیم پړاو کې د دوی لپاره د کرونا ویروس د واکسین د تطبیق لړۍ پیل شوه.
د افغانستان عامې روغتیا وزارت د معلوماتو له مخې تر دې دمه په ټول افغانستان کې ۴۵ زره کسانو ته د کرونا ضد واکسین رسېدلی دی.
دغه وزارت وايي چې تر دې دمه هندوستان ۵۰۰ زره دوزه واکسین او دغهشان د واکسین نړیوالې ادارې ۴۶۸ زره دوزه واکسین له افغانستان سره مرسته کړې او ټاکل شوې چې د کواکس نړیواله اداره ۱۶ ملیونه او چین ۴۰۰ زره دوزه واکسین افغانستان ته ورکړي.
د دې واکسین له تطبیق وروسته شدیده تبه، ځان درد او د ستړیا احساس هغه څه دي چې د عامې روغتیا وزارتيې جدي ستونزې نهګڼي او وايي چې دا علایم د واکسین د مثبت اثر نښې دي.
عامې روغتیا وزارت وايي چې له دې پړاو وروسته به له ۱۸ کلونو د لوړ عمر لرونکو عامو افغانانو ته د دې واکسین د تطبیق چارې پيل شي.
د کرونا ویروس ضد واکسین د عملي تطبیق چارې د روانې حوت میاشتې په پنځمه پیل شوې چې لومړي سر کې روغتیا پالانو او د رسنیو یو شمېر کارکوونکو ته تطبیق شو، خو یو شمېر خلک انتقاد کوي چې تر ډېره لوړپوړو دولتي چارواکو ته د واکسین په تطبیق کې لومړیتوب ورکړل شوی دی.