انډیپنډنټ: افغان ولسمشر ۲ وزیران وټاکل، خو په واک کې شریک یې غوسه کړ
انډیپنډنټ
انډیپنډنټ ورځپاڼې تردې سرلیک لاندې لیکنه خپره کړې ده، افغان ولسمشر دوه وزیران وټاکل، خو په واک کې شریک یې غوسه کړ.
ورځپاڼه لیکي، د اشرف غني له لوري د کابینې د دوو مهمو غړیو تغییر په حکومت کې د پیاوړي شریک عبدالله عبدالله له سخت غبرګون سره مخامخ شو.
انډیپنډنټ بیا دې اختلاف ته په اشارې سره لیکي چې دا په داسې وخت کې رامنځته کېږي چې د امریکا د متحدایالاتونو له لوري دا فشار په زیاتېدو دی چې له طالبانو سره سوله وشي.
اشرف غني او عبدالله عبدالله تېرکال د مې میاشتې په شلمه د واک د شراکت یوه موافقه وکړه.
دا موافقه دوې میاشتې وروسته تردې وشوه چې دغو دواړو د دوه زره نولسم کال د سېپټبمرد ولسمشرۍ په انتخاباتو کې ځانونه بریالي اعلان کړي وو.
د موافقې له مخې اشرف غنی ولسمشر پاتې شو او عبدالله عبدالله د ملي مصالحې د عالي شورا مشر شو. همدا راز د موافقې له مخې عبدالله عبدالله ته د کابینې د نیمایي وزیرانو د ټاکنې واک ورکړل شو.
ولسمشر اشرف غني د جمعې په ورځ د کورنیو چارو وزیر مسعود انداربي برطرفه کړ، د ده پرځای یې حیات الله حیات د سرپرست وزیر په توګه وټاکه، همدا راز لوی درستیز یاسین ضیا یې د سرپرست دفاع وزیر په توګه تعیین کړ.
انډیپنډنټ لیکي:
د دې تغییراتو په اړه ډېر لږ توضیحات ورکړل شوي دي، خو دې اقدام عبدالله عبدالله په قهر کړ او د شنبې په ورځ یې په یوه بیان کې څرګنده کړه چې دا پریکړه په اوسنیو شرایطو کې د هېواد د ګټو په زیان ده او د منلو نه ده.
دغه بریتانیایي ورځپاڼه وړاندې لیکي، دا تغییرات په داسې وخت کې راغلي دي چې د مې د لومړۍ نېټې ضرب الاجل په رانژدې کېدو دی چې ترهغه وخته به ټول امریکایي سرتیري له طالبانو سره د شوې موافقې له مخې له افغانستانه وځي او په ورته وخت کې امریکا پر افغان حکومت او طالبانو فشارونه زیات کړې دي چې سوله وکړي.
د ورځپاڼې په باور د کابینې دا بدلونه ښایي د ولسمشرغني له لوري د امریکا د فشار پر وړاندې د درېدو یوه نښه وي او همدا راز د موقتې ادارې د ملاتړ د زیاتیدو په وړاندې دریدل وي.
انلاین پولیټیکو
امریکایي خپرونې، انلاین پولیټیکو بیا په افغانستان کې د امریکا د متحد ایالاتونو د پوځي حضور په ارتباط د ولسمشر جوبایډن نظر په یوه تحلیلي مطلب کې رااخیستی دی.
جوبایډن په دوه زره لسم کال کې د افغانستان او پاکستان لپاره د امریکا د هغه وخت له ځانګړي استازي ریچارد هولبروک سره په یوه خصوصي غونډه کې پر دې سخت غبرګون ښودلی و، که امریکایي ځواکونه له افغانستانه ووځي هلته به د طالبانو تر رژیم راوروسته د افغان ښځو ترلاسه کړيو حقوقو ته سخت زیان ورسیږي.
پولیټیکو لیکي:
بایډن هغه وخت ویلي و چې بیا به خپل زوی د ښځو د حقونو لپاره هلته ونه لېږي چې ځان په خطر کې واچوي.
پولیټیکو خپرونه لیکي، د بایډن دا خبرې په هغو یادښتونو کې خپرې شوې دي چې هولبروک لیکلي دي او دا د ده له مړینې وروسته 'زموږ د خلکو' په نوم کتاب کې خپرې شوې دي.
په دې کتاب کې د بایډن په وینا راغلي دي چې باید له افغانستانه ووځو.
د خپرونې په باور دا دی تر دې خبرو لس کاله وروسته جو بایډن فرصت ترلاسه کړی دی، خو لاهم د ده پروګرام په افغانستان کې د پاتې دوه زره پنځه سوه امریکایي پوځیانو په اړه روښانه نه دی.