Қазоқистон аз 31 август карантинро дубора сабук мекунад
Мақомоти Қазоқистон эълом карданд, ки карантини сахти эъломшударо дар пайи афзоиши якбораи шумори мубталоён ба коронавирус, сабуктар хоҳанд кард.
Бар асоси қарори комиссияи байниидоравӣ, сар аз рӯзи душанбеи оянда қарор аст, дарҳои иттиҳодияҳои динӣ, фарҳангӣ, толорҳои варзишӣ, ҳавзҳо ва маҷмааҳои варзишӣ дубора боз шуда, ба тамринҳои оммавӣ бо риояи фосилаи иҷтимоӣ иҷозат дода хоҳад шуд.
Сар аз 31 август дар ин кишвар боғу мамнуъгоҳҳои миллӣ низ дубора фаъолият хоҳанд кард. Вале ҳангоми вуруд пӯшидани ниқоб ҳатмӣ аст. Дар ҳукумати Қазоқистон гуфтанд, ки қарор аст, ҳаракати нақлиёти мусофирбар миёни шаҳрҳои ин кишвар низ аз сар гирифта шавад.
Ин қарор "бо назардошти таъсири мусбати карантини эъломшуда" гирифта шудааст. Ба иттилои ҳукумати Қазоқистон, мубталошавӣ ба коронавирус дар давраи карантин 10 баробар кам гаштааст.