Президенттин милдетин аткаруучу Талант Мамытов ЖККУнун онлайн жыйынына катышты
Кыргызстандын бийлиги 10-январга белгиленген президенттик шайлоону таза жана атаандаштык негизде өткөрүү үчүн бардык аракетин жумшайт, себеби бул өнөктүк өлкөдөгү абалды мындан ары турукташтыруу үчүн маанилүү кадам болуп эсептелет. Бул тууралуу президенттин милдетин аткарып жаткан парламент төрагасы Талант Мамытов 2-декабрда Жамааттык коопсуздук келишим уюмунун (ЖККУ) видеоконференция форматында өткөн жыйынында билдирди.
Мамытов азыр Кыргызстанда коомдук-саясий абал туруктуу экенин белгилеп, өлкө бардык эки тараптуу жана көп тараптуу эл аралык келишим жана макулдашуулар боюнча милдеттенмелерин аткарарын айтты.
Ошону менен катар ал ЖККУ аймактык жана глобалдык коопсуздукту камсыз кылуу боюнча реалдуу мүмкүнчүлүккө ээ экенин кошумчалап, мында Орусиянын өзгөчө ролу бардыгын белгиледи.
ЖККУнун мүчөлөрү - Армения, Беларус, Казакстан, Кыргызстан, Орусия жана Тажикстан.(RK)